Discurso di Su Majestad Rei Willem-Alexander (Papiamentu)

Miembronan di Parlamento General,
Awe mi a bini boso Reunion Uni, pa keda juramenta y instala como boso Rei. Pa e motibu aki, como representante di pueblo elegi, boso ta aki huntu den capital. Esaki ta simboliza nos relación constitucional.
Den transcurso di dos siglo e Reinado Hulandes a mara inseparablemente cu e democrasia parlamentario. E instalacion aki y e huramento cu mi ta haci aki ratu, ta confirma e union ey, cu ta ancra den e Statuto di Reino y e constitucion.
Democrasia ta basa riba confiansa mutuo. Confiansa di ciudadano den su gobierno. Un gobierno cu por tene su mes na regla y ta brinda perspectiva. Pero tambe confiansa di e gobierno den su ciudadanonan. Un pueblo cu ta sinti su mes corresponsabel pa e interes general y ta sali pa otro. Tur empleado publico, sea elegi, nombra o apunta mester aporta nan parti na e confiansa ey. Asina ey ta mantena democrasia.
"Pa gana confiansa mutuo tin un tarea continuo den chiki y den grandi." Esei mi mama a menciona den su ultimo discurso di pascu como Reina. Trintitres aña largu el a duna confiansa y no a abusa di e confiansa haya. Esey ta e base di su autoridad. E tabata para pa e balornan ancra den e constitucion y na cual el a mara su mes ceremonialmente dia 30 di april 1980. E tabata duna realse na esey ora e tabata haya nesesario. Pasombra e echo cu e Rei no tin responsabilidad político, no ta nifica cu e no ta carga responsabilidad propio. Sino e juramento, cu aki ratu ami tambe lo haci den e Reunion Uni aki, lo no tin balor.
Kerida Mama,
Bo tabata Reina completamente consciente di e responsabilidadnan cu esaki ta mara na dje. Bo tabata henteramente dedica na e obligacionnan di bo funcion. Pero bo tabata tambe yiu muher, esposa, cabes di famia y mama. Na kada un di e responsabilidadnan ey tambe bo tabata kier a duna realse total. Esey a ocaciona tension interno debesencuando. Pero bo tabata sa di uni bo obligacionnan multiple den un contexto anima. Nunca tabata haci un apelacion en bano riba bo. Tambe riba dianan di tristesa personal bo tabata un sosten di confiansa pa nos tur na e manera di mas cariñoso.
Cu yudansa di mi tata bo a desaroya bo mes estilo komo Lareina. Popularidad cortico no tabata e compas riba cual bo tabata biaha. Bo a mantene un rumbo stabil y puro pasombra bo ta sa di ta forma parti di un tradicion largo. Trancil entre momento turbulento.
Mi ta sigui bo pasonan. Mi tin un bista cla di mi funcion. 'Kico futuro por trese', niun hende no sa. Pero unda cu e caminda bai y kon leu e mester hiba mi, bo sabiduria y bo kalor lo mi carga cu mi semper.
Mi sa cu mi ta expresa e sintimento di hopi hende na Hulanda y di e partinan di Caribe den nos Reino ora mi bisa: danki pa tur e añanan bunita den cual nos por tabatin bo como nos Reina!
Kada Rei ta duna su mes interpretacion na e funcion. E ta un otro persona, den un otro epoca. Reinado no ta estatico. Den nos reglanan segun derecho estatal e por a adapta su mes continuamente na situacionnan cu ta cambia. E espacio aki e ministernan i Parlamento General a ofrece e Rei tambe.
Alabes e Reinado ta un símbolo di continuidad i colectividad. E ta un conexion directo cu nos pasado estatal, e tapijt di nos historia caminda awe nos tambe ta sigui teje conhuntamente. Den historia nos ta haya e balornan cu nos ta komparti ancra. Un di e balornan aki ta trata e papel serviente di e Rei. E Rei ta ejerce su funcion na disposicion di e komunidat. E realisacion profundo aki ta keda registra pa Parlamento General ya na 1581 den e placa di Verlatinghe, e acta di nasemento di locual despues a bira Hulanda.
Mi ta drenta den un periodo cu hopi den Reino ta sinti nan mes vulnerabel y insigur. Vulnerabel den nan trabou o cu nan salud. Insigur encuanto nan entrada o circunstancia di biba. Cu yunan ta bai tin un mehor bida cu nan mayornan, ta parse di ta menos evidente cu antes.
Kada ken riba su mes ta parse manera nos tin menos grep riba desaroyo cu ta influencia nos bida. Nos forsa no ta sinta den isolacion, pero den coperacion. Como famia. Como amigo. Como habitante di un caya o bario. Como ciudadano di nos Reino. Y como habitante di e mundu aki, cu ta keda confronta cu diferente encargo cu por soluciona solamente riba relacion internacional.
Unidad y diversidad. Ser único y tin e capacidad pa adapta. Realicacion di balor di tradicion y curiosidad na loke futuro ta trese. E caracteristicanan aki a forma nos na ken nos ta den transcurso di nos historia.
E nesesidat grandi pa explora y preferiblemente expande fronteranan a hiba nos leo! Cinco paisano special ta para símbolo pa esei. Nan ta yena akinan, awe, un papel tradicional, pero ta na mes momento e prueba vital di loke nos ta capaz di dje.
Tras di nan ta para cienmil otro cu ta distingui nan mes na nan mes sistema. Nan aporte tambe ta indispencabel. E speransa di nos pais ta escondi den e interaccion harmonioso di tur e personanan ei, cu nan talento, grandi y chikito. Inventividad, animo i sinceridad ta nos forsa pa siglonan largu. Nos por ofrese e mundo hopi cu esaki.
Komo Rei mi ke estimula hende pa uza activamente e posibilidatnan cu nan tin. Con grandi e diversidad ta, con diferente nos conviccion i soño por ta, sin importa unda nos lombrishi por ta dera, den e Reino Hulandes tur hende por laga scucha su voz y traha conhuntamente riba nivel di igualdad.
Cu orguyo lo mi reprecenta e Reino y yuda descubri oportunidadnan nobo. Mi ke haci conexion, señala relacion y propaga loke ta uni nos, Hulandesnan, tambe den tempu di alegria grandi y tristesa profundo. Asina ey ami como Rei por fortifica e confiansa mutuo entre ciudadano y gobierno, mantene e democrasia y sirbi e interes general.
Mi ta asumi e funcion aki cu gratitud. Gradisido pa e educacion cu mi mayornan a duna mi y pa e espasio cu mi a haya pa prepara mi mes pa e funcion aki. Hopi a yuda mi cu consejo y acto; tur mi ta yama danki.
Gabinetenan consecutivo, sostene pa Parlamento General, a duna mi e posibilidad pa por tin un papel propio riba diferente tereno di trabou. Asina ei mi por a haci hopi den y pa Hulanda. E trabou ey a haci mi consciente di loke mi por nifica den mi posicion. Tambe el a duna mi e oportunidad di adquiri un bista solido den topiconan cu ta fundamental pa nos pais, manera un maneho responsabel cu awa.
Experencia nacional y internacional a forma mi na ken mi ta. Cu confiansa mi ta tribi bisa mi mes y mundu: mi ta acepta e funcion aki cu conviccion. Ademas mi ta realisa con enormemente felis mi ta cu sosten di mi casa Máxima. E ta consiente di e limitacion personal cu su posicion ta exigi di dje debesencuando. El a sera nos pais den su brasanan y a bira Hulandes entre Hulandesnan. E ta completamente dispuesto pa pone su numeroso capasidatnan na disposicion di mi Reinado y e Reino di nos tur.
Miembronan di Parlamento General,
Awe nos ta confirma na otro nos responsabilidat y obligacion mutuo. E Statuto pa e Reino y constitucion ta nos fundeshi colectivo. Den añanan bon y ménos bon nos por sigui construi riba esei den confiansa absoluto cu huntu nos por enfrenta futuro cu kara na laira.
For di e conviccion ey mi ke cuminsá como Rei cu tur forsa cu a duna na mi.
Mi ta jura na e pueblonan di Reino cu continuamente lo mi mantene mi mes y conserva na e Statuto pa e Reino y constitucion.
Mi ta jura cu lo mi defende y conserva e independencia y e teritorio di e Reino cu tur mi forsa; cu mi ta proteha e libertad y derechonan di tur Hulandes y tur residente, y utilisa tur medio cu lei ta pone na mi disposicion pa mantena y promove prosperidad, manera ta obligacion di un bon y fiel Rei.
Cu Dios todopoderoso lo yuda Mi!