Tekst van de brief van Koning Willem-Alexander ter gelegenheid van de rehabilitatie van Tula in Papiamentu
Na pueblo di Kòrsou,
Riba 3 di òktober 1795 Tula, e lider di un di e rebelionnan di mas grandi kontra e sistema di sklabitut den Karibe, a muri. Bou di mando di outoridatnan kolonial hulandes a husg’é di forma kruel, huntu ku algun di su kompañero den lucha.
Den historia di boso pais i di nos Reino e figura Tula ta pará firme i ku orguyo. E ta inspirá atmirashon i rèspèt pa motibu di su kurashi i liderazgo. Pa su lucha kontra di eksplotashon denigrante di hende. I tambe pa su idealnan pa kua e tabata kana dilanti di su tempu.
Tula tabata un hende ku pensamentu i sintimentu moderno. Kontra di esnan na poder ku a keda pegá den inhustisia i opreshon, el a para pa e prinsipio i balornan di Revolushon Franses: libertat, igualdat i hermandat. Di forma impreshonante el a ekspresá esaki; inteligente, rasonabel, humano. “A maltratá nos hopi pisá”, el a bisa. “Nos no ke hasi niun hende daño. Nos ta deseá nada mas ku nos libertat.“
Tula tabata un héroe den su akshon i su pensamentu. Durante di mi bishita huntu ku mi kasá i mi yu muhé mas grandi na febrüari 2023, nos a bishitá plantashi Kenepa i ei atrobe nos a keda impreshoná ku su personalidat. Tula a sa di inspirá hopi hende pa lucha pa eksistensia humano, liber di sklabitut. E ta pará komo símbolo di lucha i derecho di kada individuo. E ta pará tambe komo símbolo di e forsa di Kòrsou.
Na 2010 Kòrsou a rekonosé Tula komo héroe nashonal. Hopi di boso a hinka nan alma i kurpa pa gobièrnu Hulandes tambe rehabilitá Tula. Awe esaki a sosodé.
Awe, komo boso Rei i komo parti di Gobièrnu di Hulanda mi ke pa boso komprondé kon profundo i personal mi ta sinti e rehabilitashon aki.
Nos ta karga nos historia kompartí, inkluyendo tur e krueldat, tur doló i tur tristesa. Ta importante pa rekonosé erornan di pasado. Rehabilitashon di Tula ta nifiká reabilitashon di un gran hòmber ku a ninga di baha kabes i keda ketu. Su bos ta sigui resoná i ta rekordá nos ku na final ta libertat tin e último palabra.
Su Mahestat Rei Willem Alexander